E Larve und e Clown am Ranze,
e dummi Schnuure no derzue,
e Grytte wo ka Raspa danze,
denn hett dr Zircher Böög si Rueh.
Mir Basler aber lache numme
und plötzlig foht ain afoh z summe:

Refrain
Mir saages jedem Schnuuderi,
dert duure simmer hart.
Wenns rätzt und hesch dr Guderi,
denn wirsch du nie kai Pfluderi,
Waisch das isch Basler Art

Und wenn au s Näscht in d Pfandleih schlittlet,
mitsamt dr Mammen ihrem Schmugg,
dr Fasnachtskitt sich yskalt schittlet,
e Basler gits sich halt e Rugg
und grinst, -jä mainsch mir sinn die Dumme
Nai- jetzt fangt aine afoh z summe:

Refrain

Firs drummle sait me z Basel ruesse
und Piccolo sin Jubeldeen.
In Ziri zahlt me fir das Buesse,
will sis im Ussland nit verstehn,
mir Basler aber , he mir summe
und meege si au no so brumme:

Refrain

Duet denn d Ladärne farbig lychte
und d Guggemuusig bloost ains dry,
denn heersch zwai Bebbi zämme bychte,
gäll usswärts darf nie Fasnacht sy.
Isch au dr Baslerstab e krumme
So heersch is trotzdäm kräftig brumme:

Refrain

Basel und d Fasnacht das gheert zämme,
denn baides isch vo gsundem Holz,
do bruuchts sich kaine von is z schämme.
Im Gegedail , mir sinn druff stolz
Und wenn die Andere no so brumme
bi uns do goht e Liedli umme:

Refrain

Mir saages jedem Schnuuderi,
dert duure simmer hart.
Wenns rätzt und hesch dr Guderi,
denn wirsch du nie kai Pfluderi,
Waisch das isch Basler Art

Refrain