Und zmittsdrin, vo dene globaale Gscheenis, e glaini Stadt am Rhy, mit emene Bruuch wo sich syt vyyle wyt iber dryssig Joore, widerhoolt. Wo d Seel vo dääne Yywooner fir weenigi Stund in e andri Wält kataphuldiert! Frei vo allne Alldaagssoorge, ryych gsäägnet mit Gliggshormoon und ere Lääbere, wo mit irer Uffgoob waggst. 
E Bruuch, däm sich au e Pherseenligkait verschryybe het. Syni kinschtlerische Feertigkaite jeedes Joor im ene neie Gwand zaigt und wo in dr Dunggelhait wie e lyychtende Stäärn, dr Wääg in die näggschti Baiz duet wyyse.

Vyyli wisse wär aagsprooche isch und e männge Pfluderi kennt si, d Fasnachts-Ladäärne vo unserem Kurt. Kai Gstell, kai Foorm, schyynt em unmeeglig, ganz noo sym Waalspruch: Goot nit, gits nit! Sy Ydeeryychdum und Gwunder fir Thechnigg lehn vermuete, ass är sy gaischtigs Botänziaal underem Joor nit voll ka uuslääbe. Au bikunnt me dr Yydrugg nit loos, dass är bi sym kinschtlerische Schaffe, syne Wäärgg e Lääbe yyhuucht, wo em Bublikum e unglaubligs Stuune duet entlogge. 

Syt 1985 baut und moolt dr Kurt Heinzelmann Joor um Joor, innovatyyvi und spezielli Faasnachts-Ladäärne in dr Pfluderi Alti Garde. Es isch saage und schreibe, syni dryssigschti Ladäärne wo uns dr Kurt uff die Faasnacht gmacht het. E Biischuu vo nere Ladäärne, wie allewyyl mit groosser Lyydeschaft und vyyl Liebi zem Dedail. Daas gseesch uff dr Ruggsyte ganz scheen, dert isch nämli e Potpourri mit Fasnachts-Sujet, vo de letschte drei Joorzäänt uffgmoolt, aifach saagehaft.

Liebe Kurt e groosses und häärzligs Danggscheen vo uns, fir die grandioose Kunschtwäärgg in de letschte dryssig Joor! Die Alti Garde hofft und fraid sich druff, au in d Zuekumpft no e baar Ladäärne vo diir deerfe z biwundere.   

Mit em Ändi vo dr Faasnacht wird jo allewyyl alles abgruumt und versoorgt. Au in dämm Joor isch daas nit anderscht gsi, mit ainer Uusnaam. Noo em usenander nää vo dr Lambbe hänggt d Ruggsyte 2015 als Erinnerig und zer Verscheenerig im Gellertkäller vo dr Alte Garde. 

Obmaa - Alti Pfluderi